Skilmálar skráningar og greiðslu hjá Fimleikafélaginu Björk
 

Uppfært 11. ágúst 2026 – samþykkt á fundi aðalstjórnar 11.ágúst 2026
 

Skilmálar þessir gilda um alla skráningu og greiðslu sem fer fram í gegnum skráningarkerfið Abler vegna starfsemi Fimleikafélagsins Bjarkar. Þeir ná meðal annars til reglubundinna æfinga á önn eða heilu starfsári, sumarnámskeiða, annarra námskeiða, móta, keppnis- og æfingaferða, viðburða og annarrar starfsemi sem skráð er í gegnum Abler.
 

Í skilmálunum er hugtakið þátttökugjöld notað sameiginlega um æfingagjöld, námskeiðsgjöld, mótagjöld og önnur gjöld sem greidd eru vegna skráningar og þátttöku í starfsemi félagsins.
 

Skráning fer fram í Abler í gegnum skráningarhlekk á www.fbjork.is. Upplýsingar um verð, æfingatíma, dagsetningar, tímabil og annað sem birtist við skráningu á viðkomandi starfsemi í Abler teljast hluti skilmálanna. Séu sérstakir skilmálar eða skráningarskilyrði birt vegna tiltekins námskeiðs, móts, ferðar eða viðburðar gilda þeir samhliða þessum almennu skilmálum.
 

1. Skráning og greiðsla

• Með skráningu í Abler staðfestir þátttakandi eða forráðamaður, eftir því sem við á, að viðkomandi hafi kynnt sér og samþykkt skilmála þessa.

• Skráning er bindandi og tryggir þátttakanda sæti eða þátttökurétt í þeirri starfsemi sem skráð er í. Forráðamaður eða greiðandi ber ábyrgð á að skráningar-, greiðslu- og samskiptaupplýsingar í Abler séu réttar.

• Gjalddagi æfingagjalda er 15. september fyrir haustönn og 15. janúar fyrir vorönn. Gjalddagar sumarnámskeiða, annarra námskeiða, móta, ferða, viðburða og annarrar starfsemi koma fram við skráningu í Abler.

• Ganga skal frá greiðslufyrirkomulagi í Abler við skráningu eða í upphafi viðkomandi tímabils. Hafi ekki verið gengið frá greiðslu æfingagjalda fyrir gjalddaga eru þau gefin út á einum greiðsluseðli.

• Ekki er hægt að skipta greiðslu vegna sömu skráningar milli foreldra eða forráðamanna í Abler.

• Kostnaður sem kann að falla til vegna breytinga á greiðslufyrirkomulagi eftir útgáfu greiðsluseðils eða vegna innheimtu vangreiddra gjalda er á ábyrgð greiðanda.

• Greiðsla þátttökugjalda er forsenda þátttöku í starfsemi félagsins. Þátttakandi getur ekki hafið æfingar eða námskeið né tekið þátt í móti, ferð eða viðburði ef eldri gjöld eru ógreidd, nema áður hafi verið samið við félagið um uppgjör skuldarinnar.

 

2. Þátttökugjöld og nýting skráningar

• Þátttökugjald miðast við þá starfsemi, það tímabil og það framboð sem tilgreint er við skráningu í Abler.

• Æfingagjöld fyrir reglubundið starf miðast við heilt námskeið eða önn. Hefji iðkandi æfingar eftir að tímabil er hafið reiknast æfingagjöld hlutfallslega frá fyrstu æfingu, enda sé laust pláss í viðkomandi hópi.

• Gjöld vegna sumarnámskeiða, annarra námskeiða, móta, ferða og viðburða miðast við þá dagskrá og þann tíma sem tilgreindur er við skráningu.

• Þátttökugjöld eru einstaklingsbundin og taka mið af umfangi viðkomandi starfsemi. Sama gjaldskrá gildir fyrir þátttakendur í sambærilegu starfi, einnig þegar fleiri þátttakendur úr sömu fjölskyldu eru skráðir hjá félaginu.

• Skráning tryggir þátttakanda sæti og aðgang að þeirri starfsemi sem auglýst er í Abler. Gjöld eru því ekki lækkuð vegna mætingar, tímabundinna fjarvista eða skörunar við annað íþrótta- eða tómstundastarf, sbr. þó 3. kafla um alvarleg veikindi, meiðsli og búferlaflutninga.

• Mótagjöld, ferðakostnaður og annar viðbótarkostnaður eru ekki innifalin í æfinga- eða námskeiðsgjöldum nema annað sé sérstaklega tekið fram við skráningu.
   

3. Afskráning, úrsögn og endurgreiðsla

• Vilji þátttakandi hætta í reglubundnu starfi, afskrá sig af námskeiði eða draga skráningu til baka skal senda skriflega tilkynningu á fbjork@fbjork.is, nema annað sé sérstaklega tekið fram við skráningu í Abler. Tilkynning til þjálfara eða aðstoðarþjálfara telst ekki formleg afskráning eða úrsögn.

• Berist afskráning vegna æfinga eða námskeiðs áður en viðkomandi starfsemi hefst eru greidd þátttökugjöld endurgreidd að fullu, nema sérstakir afskráningar skilmálar hafi komið fram við skráningu í Abler.

• Hætti þátttakandi að eigin ósk eftir að starfsemi er hafin eru þátttökugjöld almennt ekki endurgreidd. Fjarvera eða það að mæta ekki á skráða æfingu, námskeið, mót eða viðburð veitir ekki rétt til endurgreiðslu.

• Hægt er að sækja um undanþágu og hlutfallslega endurgreiðslu ef þátttakandi þarf að hætta í reglubundnu starfi eða lengra námskeiði vegna alvarlegra veikinda, meiðsla eða búferlaflutninga. Umsókn skal senda á fbjork@fbjork.isog henni skal fylgja læknisvottorð þegar sótt er um vegna veikinda eða meiðsla.

• Umsóknir eru metnar í hverju tilviki. Möguleg endurgreiðsla miðast við þann hluta tímabilsins sem eftir stendur frá því að skrifleg tilkynning og nauðsynleg gögn berast félaginu. Kostnaður sem þegar hefur fallið til vegna skráningar, þátttöku, innheimtu eða skuldbindinga félagsins gagnvart þriðja aðila er ekki endurgreiddur.

• Um afskráningu úr mótum, ferðum og öðrum viðburðum gilda jafnframt ákvæði 6. kafla og þeir sérstöku skilmálar sem kunna að koma fram við skráningu í Abler.
   

4. Breytingar og niðurfelling starfsemi

• Fimleikafélagið Björk áskilur sér rétt til að breyta æfingatímum, dagsetningum, staðsetningu eða hópaskiptingu ef rekstrarlegar eða óviðráðanlegar aðstæður krefjast þess.

• Sé um verulega og varanlega breytingu að ræða sem kemur í veg fyrir áframhaldandi þátttöku er hægt að sækja um hlutfallslega endurgreiðslu.

• Félagið áskilur sér rétt til að fella niður námskeið, mót, viðburð eða aðra starfsemi ef þátttaka er ekki næg eða ef óviðráðanlegar aðstæður koma upp. Sé starfsemi felld niður áður en hún hefst eru greidd þátttökugjöld endurgreidd. Sé hún felld niður eftir að hún hefst er sá hluti gjaldanna sem svarar til þess tímabils sem fellur niður endurgreiddur.

• Stakar æfingar eða einstakir tímar á námskeiði geta fallið niður vegna hátíðardaga, mótahalds, veðurs eða annarra óviðráðanlegra aðstæðna. Slík niðurfelling leiðir almennt ekki til endurgreiðslu, en félagið leitast við að bjóða upp á æfingu eða tíma í staðinn þegar aðstæður leyfa.
   

5. Frístundastyrkir sveitarfélaga

• Sveitarfélög veita frístundastyrki samkvæmt eigin reglum vegna þeirrar starfsemi sem uppfyllir skilyrði hvers sveitarfélags. Forráðamenn bera ábyrgð á að kanna rétt til styrks og ráðstafa honum, eftir þeim leiðum sem í boði eru í Abler, innan tímamarka viðkomandi sveitarfélags.

• Fimleikafélagið Björk hefur ekki upplýsingar um hvort einstakur þátttakandi eigi rétt á frístundastyrk eða hvort honum hafi verið ráðstafað.

• Við endurgreiðslu þátttökugjalda er sá hluti sem greiddur var með frístundastyrk ekki greiddur út til forráðamanns. Um mögulega bakfærslu eða endur ráðstöfun styrksins gilda reglur viðkomandi sveitarfélags.
   

6. Afslættir

• Ekki eru veittir afslættir. Ef iðkandi slasast og þarf að hætta íþróttaiðkun ber forráðamanni að senda tölvupóst á fbjork@fbjork.is. Skila þarf inn læknisvottorði til að fá endurgreitt. Ef ekki er látið vita fellur kostnaður vegna innheimtu á forráðamann iðkandans.

• Ekki er veittur afsláttur ef um skörun við tómstundastarf á vegum annarra íþróttafélaga eða tómstunda er að ræða. Sú afstaða skýrist á því að félagið þarf ávallt að standa undir þeim grunnkostnaði sem er við hvern flokk hvort sem iðkendur velji sér að nýta þjónustuna að fullu eður ei. 

• Enginn systkinaafsláttur er veittur þar sem það er afstaða stjórnar félagsins að allir eigi að greiða sama verð fyrir sömu þjónustu. Þegar veittur er systkinaafsláttur færist kostnaðurinn af einum kaupanda af þjónustu yfir á annan þar sem grunn kostnaðurinn við starfsemina er ávallt hin sami, þar sem ekki er um arðbæra þjónustu að ræða heldur starfsemi sem einungis á að standa undir kostnaði.

 

7. Mót, ferðir og aðrir viðburðir

• Skráning og greiðsla vegna móta, keppnis- og æfingaferða, sýninga, viðburða og annarrar tímabundinnar starfsemi kann að fara fram í Abler. Upplýsingar um verð, skráningarfrest og sérstök skilyrði koma þá fram við skráningu.

• Skráning telst bindandi þegar hún hefur verið staðfest í Abler. Eftir að skráningarfrestur er liðinn kann félagið að hafa stofnað til kostnaðar eða skuldbindinga vegna þátttöku viðkomandi.

• Hætti keppandi við þátttöku eftir að skráning á mót hefur verið staðfest greiðist afskráningargjald sem nemur helmingi viðkomandi mótagjalds, nema annað hafi verið tekið fram við skráningu.

• Við afskráningu úr ferð eða öðrum viðburði eftir að skráningarfrestur er liðinn getur félagið haldið eftir þeim hluta þátttökugjalds sem samsvarar kostnaði sem þegar hefur fallið til eða félagið hefur skuldbundið sig til að greiða.

• Fjarvera eða það að þátttakandi mæti ekki á mót, í ferð eða á viðburð veitir ekki rétt til endurgreiðslu.
   

8. Tryggingar og fyrirspurnir

• Þátttakendur eru ekki sérstaklega slysatryggðir af Fimleikafélaginu Björk vegna æfinga, námskeiða, móta, ferða eða annarrar starfsemi á vegum félagsins.

• Forráðamenn og fullorðnir þátttakendur eru hvattir til að kanna tryggingavernd sína, meðal annars í heimilis- og fjölskyldu tryggingum. Sérstaklega er mikilvægt að kanna tryggingavernd þátttakenda sem hafa náð 16 ára aldri og meta hvort þörf sé á sérstakri slysatryggingu.

• Fyrirspurnir um skráningu, greiðslur, afskráningu eða skilmála skulu berast skrifstofu félagsins í tölvupósti á fbjork@fbjork.is eða í síma 416 0160. Nánari upplýsingar um starfsemi félagsins má finna á www.fbjork.is.
   

Skilmálar þessir takmarka ekki lögbundin réttindi þátttakenda eða greiðenda. Komi upp ósamræmi milli skilmálanna og ófrávíkjanlegra lagaákvæða gilda ákvæði laganna.